අද සිදුවන්නේ බුදු හිමි දේශනා කළ සොළොස් මහ සිහිනයයි

බුදුරජාණන් වහන්සේ දේශනා කළ පන්සිය පනස් ජාතක පොත් වහන්සේගේ 77 වැනි ජාතක කතාව මහා සුපින ජාතකයයි. කොසොල් මහ රජතුමා එක් දිනක් නින්දෙන් දුටුව සිහින හා ඒවාට පිළිතුරු වශයෙන් කරුණු මෙම සූත්‍රය තුළ අන්තර්ගතය. කොසොල් මහ රජතුමා දුටුව සිහින 16 පළමුව මතක් කර සිටින්නේ ශාන්ති බ්‍රාහ්මණයාට හා පුරෝහිත බ්‍රාහ්මණයා වෙතය. ඔවුන් පිළිතුරු වශයෙන් සඳහන් කර සිටින්නේ රජතුමාට එයින් සිදුවන අනතුරු පිළිබඳවය.

Related

ගමේ නමින් ඉදි කළ විලස්ගේ සිහින මාළිගය ඇඩිෂම් මන්දිරය

එනම් රාජ්‍යත්වයට, බෝග සම්පත්වලට හා ජීවිතයට අනතුරක් වන බවයි. කොසොල් රජතුමා මෙතුළින් තැති ගැන්මකට ලක්වූ අතර එයට විසඳුමක් වශයෙන් බමුණන් සඳහන් කරන්නේ සත්ත්වයන් ගින්නට දමා දෙවියන් සතුටු කරන සර්ව චතුස්ක නම් වූ යාගය සිදු කළ යුතු බවයි. මෙහිදී ශ්‍රද්ධාවෙන් හා බුද්ධියෙන් අනූන කොසොල් රජතුමාගේ බිසව වූ මල්ලිකා දේවියගේ උපදෙස් මත එම යාගය කිරීමට පෙරාතුව මේ පිළිබඳ වැඩි විස්තර දැන ගැනීමේ අදහසින් බුදුරදුන් හමුවීමද සිදු කරනු ඇත. එහිදී බුදුහිමි යථාර්ථවාදී දේශනාවක් කොසොල් රජතුමාට දේශනා කළහ. එනම්,

"උසහා රුක්ඛාගාවියො ගවාච අස්සො කංසා
සිගාලිවි කුම්භො පොක්ඛරණී ච අපාක චන්දනං
ලාපූනි සීදන්ත සිලාප්ලවන්ති මණ්ඩුකියො කණ්හා සප්පො ගිලන්ති
කාකා සුවණ්ණා පරිවාරයන්ති තසාවකා ඵලකානං භයාතීති"

මෙහිදී කොසොල් රජතුමා සිහින 16ක් දුටුව බවත් ඒවායේ තේරුම පැහැදිලි කර දෙන ලෙසත් බුදු හිමිගෙන් ඉල්ලූ පුවතක් වැඩිදුරටත් විස්තර වේ. එම ජාතක කතාවෙහි ඇතුළත් සිහින දාසය පිළිබඳ මඳක් විමසා බැලීම වැදගත් වනු ඇත.
එම සිහින 16 පිළිවෙළින් ගත්කල,

1. කළු ගොනුන් 4 දෙනෙක් රජ මිදුලට පැන තරගෙට වගේ ඇන ගන්නා විධියට ඉඳ පිරිස එකතු වූ කල ආපසු පැන දිවීම.
2. ගස් ලොකුවන්නට පෙර ගෙඩි හට ගැනීම.
3. වැදූ විගසම එම වසු පැටියාගෙන් එළදෙනුන් කිරි බීම.
4. පුරුදු ගොන් බාන පුරුදු කරත්තය නොඇද නුපුරුදු කරත්තය ඇදගෙන යෑම.
5. දෙපැත්තෙන්ම කටවල් දෙකක් තිබූ සතෙක් දෙපැත්තෙන්ම භක්‍ෂණය කිරීම.
6. කහවණු ලක්‍ෂයක් වටිනා රන් තැටියකට හූනකු මුත්‍රා කිරීම.
7. මිනිසකු ලණුවක් අඹරන අතර සිවල් දෙනෙක් එහි කෙළවර කෑම.
8. හිස් කළ ගෙඩි තිබියදී එහි නොබලා පිරුණු
කළවලටම තව තවත් ජලය පිරවීම.
9. පොකුණක සිවුපාවුන් බැස දිය බීවත් දිය බොර නොවී දියට බැස කලඹන තැනම පිරිසුදු වීම.
10. එක හැළියේ බත් තුන් විදියකට ඉදීම
11. සඳුන් අරටුවක් ගින්නෙන් දැවී අළු වීම.
12. වියළුණු ලබු ගෙඩියක් වතුරට දැමූ කල දිය යට යෑම.
13. පර්වතයක් දිය මතුපිට පාවී තිබීම.
14. රන් හංසයන්ට කපුටන් රජෙක් වීම.
15. කුඩා මැඩියො සර්පයන්ව එළවීමත් සර්පයො මැඩියන්ට බියේ දිව යෑමත්.
16. දිවියෙක් පසුපස හරකෙක් එළවා ගොස් උෟව මරාගෙන කෑම, ආදී වශයෙනි.

මෙම සිහින 16 තුළ අන්තර්ගත වන්නේ ගැඹුරු අර්ථයන්ය. රටක සමාජයක පිරිහීම මින් ප්‍රධාන වශයෙන් අන්තර්ගතය. මිනිස් ප්‍රජාව ක්‍රමක්‍රමයෙන් පිරිහීිගෙන යන කාලය වර්තමානය තුළ සිදුවෙමින් පවතී. එදා කොසොල් රජතුමා දුටු සිහින එදාට බලපාන ඒවා නොව අදට බලපාන ඒවා බව බුදුහිමි බුදු ඇසින් එදා අනාගතය බලා වදාළහ.
මෙම සිහින 16ම එකට සම්පිණ්ඩනය කොට බැලීමෙන් ප්‍රධාන කරුණු කීපයක් ඔස්සේ එය විකාශනය වී ඇති බව පැහැදිලි වේ. අද කාලීන වශයෙන් සිදුවන සියලු ප්‍රශ්න ගැටලු මෙම සිහින 16 තුළ අන්තර්ගතය. ඒවා සිදුවන අයුරු දෑසින් බලාගෙන ඉන්න කෙනකු සේ බුදුහිමි බුද්ධ ඥානයෙන් අද සිදුවන සියලු දේවල් එදා මනාව දේශනා කළහ.

යුක්තිය දහම නොපිටට පෙරළීම.
ආයුෂ අඩු වීම.
කටේ වරද නිසා නැති ප්‍රශ්න ඇතිවීම.
මවුපියන්ට, වැඩිහිටියන්ට නොසැලකීම.
දුවා දරුවන් හිතුමතේට ක්‍රියා කිරීම හා ගුරු දෙගුරුන්ටද අවනත නොවීම.
සුදුසු අයට සුදුසු තැන අහිමි වී නුසුදුසු අයට එම ස්ථාන ලැබීම.
බොරුව, වංචාව තුළින් තවකකු අසරණ වීම සඳහා ක්‍රියා කිරීම.
පිරිමින්ට ආවේණික ක්‍රියා ගැහැනුන්ද කිරීම හා කිරීමට උත්සාහ කිරීම.
දෙපැත්තෙන්ම පගා ගැනීම හා වාසි අතට නඩුහබ සිදුවීම.
සිල්වතුන්ට, ගුණවතුන්ට පූජා සත්කාර නොකිරීමත් වධ හිංසා දීමත් දුසීලයන්ට තැන දීමත් ආදිය සිදුවීම.
නිවෙස් තුළ ස්වාමි භක්තිය නොකොට පරදාර සේවනය සිදුවීම.
අයබදු ගැනීම ආදිය වැඩි වී ජනතාව කෑකෝ ගැසීම.
අපරාධ, දූෂණ වැඩිවීම හේතුවෙන් දෙවියන් කෝප වී අව්ව, වැස්ස නිසි කලට නොදී අනිසි කලට ඒවා ලැබී ජනතාවට වධ පැමිණීම.
දුසිරිත්කම් ඇති ගිහි පැවිදි අය බිහි වී බුදු සසුන කෙලෙසීම.
මිල මුදල්වලට යටවී කළගුණ සැලකීම හා ගුණධර්ම නොදත් පිරිසක් සේ කටයුතු කිරීම.
ජාතිය ක්‍රම ක්‍රමයෙන් වැනසීමත්, ඇත්ත බොරුව වී බොරුව ඇත්ත වීම මිසදිටුවන් ජය පැන් බීම.
ආගම ධර්මයට තැන නොදීම හා පහත් මිනිසුන් වැදගත් අයට ගැරහීම.
අඩු වයසින් විවාහ වීමත්, ගැහැනුන්ට මිනිසුන් යටත් වීමත්, රාගයෙන් ජීවිත පවා විනාශ කීරීම.
ගිහියන් විසින් කළ යුතු දේවල් පැවිද්දන් කිරීමත්, පැවිද්දන් විසින් කළ යුතු දේවල් ගිහියන් කිරීමත් ආදී වශයෙනි.

මේ ආදී වශයෙන් මුළු සමාජ සංස්ථාවම පිරිහීමට බලපාන සියලු ප්‍රශ්න, ගැටලු එම සිහින තුළ අන්තර්ගතය. එය අද සිදුවන අයුරු ඇස් කන් තිබෙන කාට වුවද අවබෝධ කර ගත හැකිය. එදා බුදුරජාණන් වහන්සේ පහදා දුන් මෙම සිහින 16 අද සිදුවන අයුරු අමුතුවෙන් කිවයුතු නැත. රටත්, සමාජයත්, ජනතාවත්, පිරිහීගෙන යන ප්‍රවණතාව අද ශීඝ්‍රයෙන් උත්සන්න වී ඇත. ජාති, ආගම්, කුල, මල සේම දේශපාලනික වශයෙන්ද මිනිසුන් විරසක වී භේදභින්න ගොඩනඟාගෙන තිරිසන් සත්ත්වයන්ටත් අන්ත විධියට පිරිහී ඇත.

මෙම කරුණු දැක බලා කෙනකුට හෝ පිරිසකට ආවේගයක් ඇති නොවිය යුතුය. එයට හේතුව මෙම කරුණු තුන්කාලයම කැඩපතකින් මුහුණ බලන්නා සේ දැකිය හැකි උත්තමයෙක් දේශනා කර තිබීම හේතුවෙනි. එසේ නම් අප කළ යුත්තේ තනි තනිවම මෙම කරුණු අධ්‍යයනය කොට තම තමන්ම සුචරිතවත් වීමය. එකිනෙකා තනි තනිව හැදෙන කල සියල්ලෝම හැදුණා වන්නේය. බුදු දහමේ අන්තර් ගත කරුණු ජාති, ආගම්, කුල, පක්‍ෂ භේදයකින් තොරව කාටත් පොදු වූවකි. කාල, දේශවලට සීමා නොවී සෑම කාලයටම සදාතනික අයුරින් බලපාන එම උතුම් පරම සත්‍ය තව තවත් ගවේෂණය කොට අප සැම දෙනෙක්ම හොඳ මිනිසුන් වීමට උත්සාවත් විය යුතුය. රටක, සමාජයක ජීවත් වීමේදී අප කවුරුත් වගකීම්වලින් පිරිපුන්ව සිටින්නෙමු. එබැවින් අප සියලුදෙනාම වගකීමෙන් කටයුතු කිරීමට සිතට ගත යුතුය. 2013 වර්ෂය උදාවී මාස දෙකක්වත් ගත නොවූ මෙවැනි කාලයක සියලුදෙනාටම එම කාර්ය සඳහා යහපත් ප්‍රාර්ථනා ඇතිකර ගත හැකිය. එසේ ඇතිකොට ගෙන මෙලොව ජීවිතය සාර්ථක කර ගැනීමටත් නිවැරැදිව කටයුතු කොට තම තමන්ගෙන් ඉටුවිය යුතු සේවාව ඉටු කිරීමටත් සිතට ගැනීමෙන් කළ යුතු එකම ක්‍රියාදාමය වන්නේය.

කොබෙයිගනේ පුබ්බිලිය ශ්‍රී සාරානන්ද පිරිවෙනේ ආචාර්ය ගලගෙදර රතනවංශ හිමි
-----------------------------------------------------------------------------------------------------------

කොසොල් රජු දුටු සිහින

බුදු දහමේ සදහන් කොසොල් රජු දුටු සිහින දහසය සහ එම සිහිනයන් බුදුරදුන් විග්‍රහ කොට වදාල අයුරු පහතින් දැක්වෙයි. බුදුරදුන්ගේ දේශනාවට අනුව එම සියළුම සිහනයන්ගේ විපාක අනාගතයේ දී සිදුවන්නක් බව දේශනා කොට ඇත.

කොසොල් රජු දුටු සිහින

1 වන සිහිනය

කොසොල් රජු -

"කළුපාට වෘෂභයෝ සතර දෙනෙකු යුධ කරන්නේ යැයි සතර දිශාවෙන් රාජාංගනයට පිවිසෙයි. උන් එනවිට නරඹන්නෝ මහා උද්යෝගයකින් ජය ඝෝෂා පවත්වමින් වට වී බලා සිටී. වෘෂභයෝ සතර දෙනා යුධ කරන අයුරක් දක්වා නාද කොට ගර්ජනා කොට යුධ නොකර ඉවත්ව ගියහ. ඔල්වරසන් දුන් නරඹන්නෝ වෘෂභ යුද්ධය බලන්නට බැරිව හොදටම දුක්වුණා"

බුදුන් වහන්සේ -

අනාගතයේ අධාර්මික පාලනය නිසා රටේ දේශගුණයත් කාලගුණයත් සම්පූර්ණයෙන්ම වෙනස් වෙනවා. ඒ කළට සිදුවන සිදුවීමක් පිලිබදව මෙයින් කියවේ. අනාගතයේ මිනිසුන් අදැහිමි වී මුදලට මුල් තැනක් දෙයි. වනාන්තර කපා පරිසරය ද විනාශ කරයි. මේ හේතුව නිසා නිසි කලට වැසි නොලැබේ. මහා ශබ්දයෙන් අහස ගෙරෙව්වත් වැස්ස නොලැබෙයි.

2 වන සිහිනය

කොසොල් රජු -
"රජමාලිගාවේ මිදුලේ වියතක් දෙකක් පමණ උස පුංචි ගස්වල මල් පීදිලා. ලොකු ලොකු ගෙඩි හටගෙන"

බුදුන් වහන්සේ -

අනාගතයේ පංච දුශ්චරිතයේ නිරත වෙමින් මිනිසුන් කටයුතු කරයි. පුංචි දරුවන් වැඩිහිටියන් සේ වැඩ කටයුතු කරයි. කුඩා වයසේදීම ගැහැනුන් රාගයෙන් පිනා ගොස් ආවාහ විවාහ වෙති.

3 වන සිහිනය

කොසොල් රජු -

"එදින ඉපදුණු වහුපැටියාගෙන් මව් එළදෙන කිරි බොනවා දුටුවා"

බුදුන් වහන්සේ -

අනාගතයේ පහළ වන දූ දරුවෝ මව් පියන්ට අකීකරු වෙති. ලැජ්ජා බිය නොමැතිව කටයුතු කරයි. වැඩිහිටියන්ට ගරු නොකරන නොසලකන සමාජයක් අනාගතයේ බිහිවෙයි. ඒ වාගේම දෙමාපියන්ට තම දරුවන් ළග දාසයන් මෙන් සේවය කොට ඔවුන්ගෙන් යැපෙන්නට සිදුවෙනවා. තමන්ට එහෙම උදව් කරන්නේ නැත්නම් දරුවන් තම දෙමාපියන්ට සලකන්නේ වත් නැහැ.

4 වන සිහිනය

කොසොල් රජු -

"මහ ගැල්වල පළපුරුදු නැති ළපටි ගොනුන් බැද තිබුණා. එම ළපටි ගොනුන්ට ගැල් ඇද ගන්න බැරිව ගැල් ටික ඔක්කොම නතර වෙලා තිබුණා"

බුදුන් වහන්සේ -

අනාගතයේ දැන උගත්කම් නැති මැති ඇමති වරු පාලන තන්ත්‍රයට පත්වෙයි. දස්කම් ඇති බුද්ධිමත් අයට තැන නොලැබෙයි. දැන උගත්කම් නැති නූගත් අය පාලන තන්ත්‍රයට එක්වීම නිසා රටේ පාලන තන්ත්‍රය අවුල් වෙයි.

5 වන සිහිනය

කොසොල් රජු -

"පසු පසින් දිග බෙල්ලක් ඇති, ඔළු දෙකක් ඇති අශ්වයෙකු දුටුවෙමි. එම අශ්වයා දෙපසින්ම ආහාර අනුභව කරයි"

බුදුන් වහන්සේ -

අනාගතයේ ලෝකය පාපයටම බරවෙයි. අනාගතයේ මිනිසුන් ලැජ්ජා බියකින් තොරව අල්ලස් හා දූෂණයට පෙළබෙති. මෙය පාලන තන්ත්‍රය තුලද ඉහල සිට පහලටද, පහල සිට ඉහලටද සිදුවෙයි.

6 වන සිහිනය

කොසොල් රජු -

"මහලු ජරාපත් හිවලෙකු ඉතා වටිනා රන් තලියකට මූත්‍රා කරයි. මිනිසුන් ඒ දෙස කිසිවක් නොකර බලා සිටියි"

බුදුන් වහන්සේ -

සම්භාවනීය වශයෙන් සැලකෙන මිනිසුන් අනාගතයේ දී සම්පත් වලින් පිරිහී යනවා. මෙසේ පරම්පරාවෙන් උරුම වූ වස්තුව අහිමි මිනිසුන් තමන්ගේ දූ දරුවන් සුරා සූදුවට ලොල් වූ අයතා ලෙස ධනවත් වූවන්ට සරණ පාවා දෙනවා.

7 වන සිහිනය

කොසොල් රජු -

"දුප්පත් මිනිසෙකු අසුනකට වී සම් පටක වලින් ලණුවක් අඹරමින් එම ලණුව පහත හෙලයි. එම අසුන යට සිටින හිවල් ධේනුවක් ඒ මිනිසා විසින් අඹරන ලණුව කා දමයි. නමුත් ඒ මිනිසා ඒ බව නොදනි"

බුදුන් වහන්සේ -

අනාගතයේ මිනිසුන් අතර කාම මිථ්‍යාචාරය බහුල ‍වෙනවා. අනාගතයේ ස්ත්‍රීන් තම සැමියා දහඩිය මහන්සියෙන් උපයන ධනය සොර සැමියන්ට දෙනවා. එම ස්ත්‍රීන් සාර ධර්ම හා සදාචාරය නොතකා තම සිරුර පිනවීමට ම පමනක් සිතයි. තවද බොහෝ කාන්තාවෝ තම සැමියා උපයන ධනය අර පිරිමැස්මෙන් තොරව විනාශ කරයි.

8 වන සිහිනය

කොසොල් රජු -

"මාළිගාවේ මිදුල පුරා කළ ගෙඩි අතුරා තිබුණා. සතර දිගින් එන ස්ත්‍රී, පුරුෂයන් පිරී ඉතිරී පිටාර ගලමින් තිබෙන එකම කළයකට වතුර පුරවනවා. හිස් කළ එසේම තිබෙනවා"

බුදුන් වහන්සේ -

අනාගතයේ පාලකයන් රට ආර්ථික වශයෙන් සමෘද්ධිමත් ‍නොකිරීම නිසා ජනතාව අතිශයින් දිළින්දන් බවට පත්වෙයි. එවිට රජය ජනතාව වෙත තව තවත් බදු බර පටවනවා. ධනවතුන් තව තවත් ධනවත් ‍වෙනවා. දුප්පතුන් තව තවත් පීඩනයට පත්කෙරෙනවා.

9 වන සිහිනය

කොසොල් රජු -

"පස් පියුමෙන් පිරි පොකුණක වටේ හිද වන සතුන් ජලය පානය කරති. ස්නානය කරති. එහෙත් පොකුණ මැද ජලය පමණක් අපිරිසිදු වෙයි"

බුදුන් වහන්සේ -

අනාගත රාජ්‍ය පාලකයෝ අධර්මිෂ්ට වීම නිසා බදු බරින් ජනතාව පීඩාවට පත්කරති.

10 වන සිහිනය

කොසොල් රජු -

"ලිපක් මත මහ බත් සැළියක් දුටුවා. ඒ සැළියේ පැත්තක නො පිසුන සහල් ද, තවත් පැත්තක බෙරි වූ බත් ද, තවත් කොටසක නිසි සේ ඉදුණු සහල් ද තිබෙන අයුරු මම දුටුවා"

බුදුන් වහන්සේ -

අනාගත පාලකයින් අධාර්මික වීම නිසා රට තුල නිසි කලට වැසි නොලැබේ. වැස්ස ලැබුනත් එම වැස්ස වහින්නේ සෘතුවලට අනුව නො වෙයි. කඩින් කඩ තැනින් තැන වහිනවා. තවත් පැත්තක හොදටම පායනවා. තවත් පැත්තක වහ වැසි ඇද හැලෙනවා. එහෙම වුණහම ඔවුන්ගේ අස්වැන්න සමහර තැනක බොල් වෙනවා. සමහර තැනක නියගයට හසුවෙනවා. සමහර පෙදෙසක හොද අස්වැන්නක් ලැබෙනවා.

11 වන සිහිනය

කොසොල් රජු -

"ඉතා වටිනා අනර්ඝ සදුන් අරටුවක් නරක් වූ මෝරු සැළියකට අලෙවි කරනවා දුටුවා"

බුදුන් වහන්සේ -

අනාගතයේ පුද පූජා සත්කාර වලට ගිජු වූ භික්ෂූන් නිසා ශ්‍රමණ ප්‍රති රූපකයක් බහුල වී ශාසනය පිරිහෙයි. අනාගතයේ මගේ බුද්ධ සාසනයේ බොහෝ භික්ෂූන් ලාභ සත්කාර අපේක්ෂාවෙන් ධර්මය දේශනා කරනවා. පස්කම් සැප ලබාගැනීම සදහා සිවුරු දරනවා. ශාසනයේ වටිනා කොටස් නොවටිනා අයුරින් අලෙවි වෙනවා.

12 වන සිහිනය

කොසොල් රජු -

"ඉතා සැහැල්ලු ලබු කබල් දියෙහි පාවෙන්නේ නැතිව බර වස්තුවක් මෙන් දියෙහි ගිලෙන අයුරු මම දුටුවා"

බුදුන් වහන්සේ -

අනාගතයේ සුදුස්සන්ට මැති ඇමතිකම් නො දී පහත් ගති ඇත්තන්ට ඇමතිකම් හා නිලතල ලබාදෙයි. ඒ හේතුව නිසා රාජ සභාව හිස් කථාවලින් පිරී යනවා. තවද විහාර ආරාම පූජනීය ස්ථාන වලද හිස් දේවල් ම රජ ‍වෙනවා. මිනිස් සිත් තුල හිස් දේවල්ම රජ වෙනවා.

13 වන සිහිනය

කොසොල් රජු -

"මහා විශාල කළු ගල් ජලය මතුපිට පාවෙනවා දුටුවා"

බුදුන් වහන්සේ -

අනාගතයේ පාලකයෝත් ප්‍රජාවත් උගතුන්ගේත්, බුද්ධිමතුන්ගේත්, වියත් සිල්වත් හිමිවරුන්ගේත් උසස් කථා අගය කොට සලකන්නේ නැහැ. ඔවුන් විසින් උගත් බුද්ධිමතුන් නොසලකා හරිනවා. රාජ්‍ය සභාවේත්, රටේ හැම තැනකමත් යහපත් අයගේ අදහස් නොසලකා හරිනවා.

14 වන සිහිනය

කොසොල් රජු -

"ඉතා කුඩා මැඩියන් විශාල කළු නාගයන් පස්සේ පන්නමින් අල්ලා ගෙන අඹුල දඩු වගේ මුරු මුරු ශබ්දයෙන් කනවා දුටුවා"

බුදුන් වහන්සේ -

අනාගතයේ මිනිසුන් වඩ වඩාත් රාගාධික වෙනවා. වයසට ගිය පුරුෂයන් අඩු වයසේ ස්ත්‍රීන්ට හසුවනවා. ඒ ස්ත්‍රීහුත් දේපල වලට ධනයට ආසාවෙන් වියපත් පුරුෂයින් සමග විවාහ වෙනවා. සියලු සම්පත් එම ස්ත්‍රීන් විසින් පවරා ගෙන වියපත් ස්වාමි පුරුෂයන්ට නිග්‍රහ කරමින් ඔවුන් තමන්ගේ වසගයට ගන්නවා.

15 වන සිහිනය

කොසොල් රජු -

"කපුටෙකු ඉතාමත් ලස්සන ස්වර්ණ හංසයන් පිරිවරාගෙන සිටිනවා දුටුවා"

බුදුන් වහන්සේ -

අනාගතයේ පහත් වැඩ කරන දාමරිකයන්, මිනීමරුවන්, සොරුන් වැනි හීන මිනිසුන්ට පාලකයින් විසින් සම්භාවනීයත්වය දෙන නිසා ඒ අය ඉහළින් වැජඹෙනවා. ඒනිසා උගතුන්ට, බුද්ධිමතුන්ට ඹවුන්ගේ යටතේ සිටීමට සිදු වෙනවා.

16 වන සිහිනය

කොසොල් රජු -

"එළුවන් විසින් රුදුරු ව්‍යාඝ්‍රයන් පසු පස එලවා ගොස් උන්ව ගොදුරු කර ගන්නා ආකාරය දුටුවා"

බුදුන් වහන්සේ -

අනාගතයේ දී පහත් ගති ඇති අයට රජයෙන් වරප්‍රසාද ලැබෙන නිසා මිනිසුන්ට පාරම්පරිකව අයිති ඉඩම් කඩම් ඔවුහු විසින් කොල්ල කනවා. මිනිසුන් අධිකරණයේ පිහිට සෙවීමට ගිය කල්හි ඔවුන්ට මේ දාමරිකයන්ගෙන් තාඩන පීඩන විදීමට සිදු වෙනවා. අත පය කපා ගැනීමට ද සිදු වෙනවා. ජීවිතය ආරක්ෂා කර ගැනීම සදහා ඔවුහු තම ඉඩම් කඩම් වල ආසාව අත් හැර ඒවා දාමරිකයන්ටම දෙනවා. සිල්වත් ගුණවත් භික්ෂූන් වහන්සේලා ද අධාර්මික දුස්සීලයනට බලයත් ඉහල තනතුරුත් දැරීමට ඉඩ දී නිහඩව සිටිති.

-sinhayareader-